De nächst Tour leepen wie weer naa Puttgaarnriff to, keem dor Naahmeddaags ümm ½5 an, in de ganze Belt, so wied wie sehn, weer nirgens een Boot uttomaken de in dütt Reveer fischten. De Wind weer heel flau südlie, wie deen uns de 3½ Faden anlöön, un deen Utsetten so dat wie de Waderstand beheeln. De irst Drift bröögt uns bie 2 Stieg Struffbütt in een gode hallbe Stünn, in de Drift op Gegenkurs wo dat all schummarie weer harrn wie 3 Stieg ok in een gode halbe Stunn, de 3. Drift weer'd düster, naa een ¼ Stünn keem överd Land een dicke Daakbank över uns wegg gahn, in düstern bie dicken Daak, kunn man bald nie von achtern naa vörn kieken, mußten ümmer löön ümm de Waderstand to holln. Dat enzig Anholln, weer dat Daakhorn vun Marienleucht, düsse Drift bröög uns 4 Stieg Struffbütt un wull 2 Zentner Dösch von 2-3 ℔ dat Stück, harrn bald ¾ Sfünn fischt un weern dorbie in de Dangngrund ünner Marienleucht rinn kaam, op uns Liens seed een Barg Dang'n un irst rech över de Zees. Wie deen op Gegenkurs weer utsetten, over as wie een Tiedlang fischt harrn, segg een to min Macker Fide irgendwat iss dor mit uns Gescheer nie in Ordung, denn laad uns man ophohln. Un richdie weer dor wat nie klaar, denn uns ganze Zees, weer mit dat lang Dang'n in een Wust opspunn, wie deen uns Anker klaar maken, un smeeden över Bord mit een lütt beed Keed(Kette) dat wie dor bloß vör ling'n kunn, deen dor wor een ganz Tied över weggahn er wie de Zees wer klaar harrn. Wie weern all een ganze Stünn bie ümm de Zees weer klaar to krieg'n, un noch nie mol de halbe Zees weer klaar, do segg ick to mien Macker, wees wat, hier sidd wie morg'n Fröh noch bie, laad uns de Zees affstecken, un een anner vörsteeken, hee segg, dat harrn wie man glieks doon sull'n, denn harrn wie nu all een Drift mehr makt. Wie steeken een anner Zees vör, deen noch gau paar lütt Keeden an de Ünnerdell fast maken, deen uns Anker inhohln, un deen vun hier, utsetten op 3½ Faden Waader, fischten een halbe Stünn, de Drift brögg uns 3½ Stieg Struffbütt, wie deen weer utsetten un fischten naa de Dang'ngrund to, deen over eben vörheer ophohln, de Drift bröög weer 3½ Stieg, so deen wie dor glieks weer utsetten op Gegenkurs mußten jo all ogenblick uns Lot över Bord smidden dat wie de Waderdeppte beheeln, aß wie een halbe Stunn fischt, harrn wie noch god Faden an'd Lot, so deen wie noch een beed länger fischen, mit eenmaal bleef uns Motor stahn, ick steeg naa de Motor daal, de em Utkoppeln, de hier un dor fölln an de Laagers, wer nichts to finn, de de Motor weer ingang'n sedden, de leep glieks weer an, ick rut mit de Latern, un de bie de Achtersteev daal lüchen, dor seh ick de Bescheerung, harrn een ganze Zees in de Schruuf, rund ümm Achtersteeven un Roor dreeb'n de Glas kugeln an de Boomdell, ick segg't to mien Macker, Fiede weest wat, dat iss „Paul Vick” sien Zees, hee hätt, emm nie loskreeg'n, un hätt sien Liens kapp, un iss naa Huus fohrt, jo segg mien Macker, so iss dat wähn, unn wie sidd nu mit de ganze Bescheerung in uns Schruuf, dat heelb jo alln's nichts, wie mööd sehn, dat wie dor vun los komt, laad uns man irst uns Gescheer inhohln, over wie, seggt mien Macker, ick segg ganz eenfach, wie hievt de Bree naa uns to, ick dee, de Winnsch anstelln, uns Boot dreih sick rümm mit de Steev

935

naa uns Gescheer to, aß wie Kraft op de Draht harrn, keem de Scheerbree naa uns to, denn wie weern naa achtern jo verankert, dör de Zees in uns Schruuf, de doch in de Grund noch fast seed, over mit eenmaal de ick marken, dat uns Boot naa de Scheerbree to gahn de, dornaa weer de Zees, de wie in de Schruuf harrn, vun de Haakstell los weer. Wie keeken beide achter rut, un lüchten mit de Latern un sehn, dat de ganze Bescheerung achter uns rann schleepen dee, in de Tied dat wie uns Gescheer inhohlten, weer een lütt flier Wind op kaam, ick keek naa uns Kopaß, oh je, de Wind keem ut Südost, ut een Eck de wie garnie bruuken kunn. Wie deen uns segel seeten, un deen uns Liens un Zees inhohln, deen oppaßen, dat uns Boot mit Segel op, mit de Vörsteev naa de Belt to falln de, un nie naa Land to, aß wie de Zees an Bord, weern dor noch över 3 Stieg Struffbütt in, dat uns dütt ok passeern müß, mit anner Lüüds Schleepnett, bie uns in de Schruuf, sunst harrn wie sick hier hütt Nacht, een schöneen Fang tosaam fischt, over nu weern wie, so to seggn K.O. Aß wie uns Gescheer an Bord, göng'n wie mit uns Boot irstmaal op Nordwest

936

Kurs, de flaue Südost harr lütt beed to nahm, over de Nebel weer noch so dicht, een ünnerscheed weer in düstern över de dichte vun Nebel nie fast tostelln. De flaue Südost, de uns irst nie paßen de, keem uns nu over god to paß, wie wull'n sehn dat wie ümm Westermarkelsdörp rüm keem, un sehn, wenn de Witterung so bleff, naa Flühsand hintokaam, dor op flach Wader ankern, un bie Dag versööken de Bescheerung ut de Schruuf to krieg'n, dat wie weer Manöverrirung fahig worn. Ümm Westermarkeldörp keem wie god rümm, harrn sick de ganze weg op 3 Faden Waader lang loot, aß dat Daakhorn vun Westermarkelsdörper-Füürturm naa achtern ut wanner de, mußten wie op Süden to Westkurs gahn, hier deen wie sick ok op de 3 Faden lang löön, aß wie dat Daak horn von Flüh-Füürturm hörten deen wie beed op ¾ Faden Wader rann gahn, un göng'n dor för Anker, dat weer ümmer noch dick vun Daak un de Wind keem heel flau ut Südost. Bie Dag warn, weern wie an Deck, dat weer dotstill, over so daakig, dat wie nie dat Land sehn kunn, wo wie doch nie wied vun aff wähn mußten, denn wie harr bie uns Achtersteeven man 1,20 Waader, un uns Keel müß ungefähr de

937

Grund beröörn, wie drunken irst Kaffee un denn wull'n wie sehn, dat wie de Zees ut uns Schruuf rut kreeg'n, denn wie kunn doch keem Stee hinkaam, mit dat ganze Gedrabbel bie uns in de Schruuf, mit uns Bootshaak, kunn wie een Deel vun de Zees an Bord hohln un in de Steert weern noch 1½ Stieg Struffbütt, bie Dag kunn wie ok sehn wo wie mit uns Bootshaak wat to faadten kreeg'n wat wie an Bord nehm kunn, so ok de Ünnerdell, denn wat bie uns in de Schruuf seed weer de Boomdell, de wie de Ünnerdell ut Herkulestauwark weer, wie deen een Brotmesser an uns Bootshaaken fast zürn, wull'n versööken, vun dat wat in de Schruuf seed, wat aff to fitzelln, over dat wor nichts, denn de Boomdell ut Herkules harr sick een paarmaal, wie ok dat Nettgaarn wat an de Boomdell weer, ümm de Schruuf wickelt, wie weern nu all een Stunnstied bie to öckern wähn, do de ick to mien Macker seggn, bööd du man de Herd an, dat de Kajüt warm ward, un bring'n de Bootsmannstohl mit, ick de mie Hammer un een scharp Meissel ut Motorruum hohln, un trock mie ut, de Bootsmannsstohl harrn wie klaar makt, mien Macker nehm 2 Törns ümm uns Leuwaag'n förd Grodsegel, ick de mie op de Bootsmannstohl

938

seeden un leed mie langsaam in'd Wader daal fiern, so wied dat ick an de Schruuf rann keem, mien Macker dee de Liens an de Leuwaagen beleng'n dee fier mie Hommer un Meissel daal, as ick een ganz Deel vun dat Gedrabbel vun de Schruuf affklaarn kunn, de Boomdell ut Herkulestauwark harr sick so fast bekneepen, dat ick de Kraam nie mit affklaarn kunn, dor dat fast ümm de Schruuf seed, kunn ick dat gauer affmeisseln, aß ick dach, in een paar Minuten, harr ick een Part vun de Boomdell affmeisselt, un kunn so de Kraam vun de Schruf affklaarn, un mien Macker, de ganze Plünnkraam an Deck hohln, dat wor over ok Tied, denn ick froor mit eenmaal wie een Hund, aß ick rinn keem in'd Wader de ick ok marken, dat Wader all, verdammt kolt weer, over bied affklaarn un dat affmeisseln heff ick dör nichts mehr vun mark, over as ick dormit ferdie weer, fung'n ick an to deppern, wie ick op Deck, göng'n ick glieks naa de Kajüt rinn, de mie irstmaal mit een Haddook dröög ruppeln, nehm mie een paar Tassen hitten Kaffee, un de glieks marken, dat mien Korper warm wor, do de ick mie antrecken,

939

un alln's weer op de reeg, mien Macker harr op Deck allns opklaart, un ick steeg, naa de Motor daal, un de emm anwarm, aß de Motor leep, göng'n wie Anker op, ick de noch een paarmaal de Schruuf in un ut koppeln, over dor weer nichts beschädigt, dat weer all in Ordung. So leepen wie naa de Howachter-Bucht to, deen dor noch 5 Drift maaken, harrn jeden Drift bie 100 ℔ grod Platen un 6-7 grod Goldbütt, een Drift harrn wie 1 Steenbütt von 8½ ℔ mit, do leepen wie naa de KielerFöör to, un leeggten sick ünner Belevue to Anker, uns Fischwark deen wie in uns Döschruus utsedden, De anner Morg'n weern wie an'd Kieler-Fischmark, vör de Goldbütt kreeg'n wie 65 Penn, vör Struffbütt 40-12 Penn, vör Dösch 18-21 Penn und vör Platen 22-25 Penn dat ℔, also weer de Reis doch nie ümsönst ween, trotz all dat Theater mit de Zees in de Schruuf Fr. Daniel