945

1931 im August

Aug. Krus un wie leeg’n in Ohrt op Fehmarn, oder op de Knust wie veelmaals segg’t wor, för schlecht Wedder. De N.Ost harr uns bie de irst Drift mit een Gewitter, ut de Belt verjaagt. As wie een Stunn in Ohrt leeg’n, keem dat Gewitter über Fehmarn weer torüch, mit een Sturm vun Nordwesten achternaa. Dör düße Sturm leeg’n wie nu all de drütte Dag in Ohrt an de Kai fast.

Naameddaags kreeg’n wie öfters Besöök vun de Ohrter Fischers. Dor weern de Gebröder Piel, se deen bie de Ünnerhohlung uns op een Fangplatz an de südliche Kannt vun de Windsgraaw opmerksaam maaken. Wo man beed op 8½ Fad’n Wader naa de Huulboje to (Westermarkeldorf) fischen kunn, de Huuler kunn man beed naa’d Steenwarder (Heiligenhafen) hinnwandern laad’n, wenn man bie Norden an een vörbie fischen de. Denn dor op de 16 Meter weer een reine Sandgrund.

An grod Goldbütt, warn dor man wenig mit fung’n. Over an grod Steenbütt, vörut geseggt de Gelegenheit ohne veel Strömung wer god, un nie to veel Böö op eenmol op dat Plaken fischten. So wer dat een Fangplatz vör Steenbütt un in Harvst ok för de Döschfang, wenn over veel Strom loppen deiht. Iss dat dor nichts mit de Fischerie, denn sidd man jümmers mang de Steen, de dor heel scharp sünd, un dat Nett iss intwei.

Se deen uns ok noch een paar Landarken, vör de 22-23 Meter bie Süden vun de Windsgraaw seggn, wo se gode Fang an Goldbütt makt harrn. Over aff un an leeg’n dor ok mohl paar böse Hakers, fischen kunn man dor ok bloß wenn wenig Strom leep.

As de Witterung sick beedern de, leppen wie mit beide Böö, naa’d Fangplatz to. Söögten sick de Waderstand op, sedden beide uns Gescheer ut op O.S.Ost-Kurs. Bie een halbe Stunn, worn wie beide fast.

Uns Wischenlien de haken, göng’n über bied ophohln ligg weer los, un uns Zees keem ohne Schaaden an Deck, mit 12 grod Goldbütt von 1 ℔ d. Stück, un 5 grod Steenbütt von 8-11 ℔ d. Stück. Wie deen mit Aug. Krus snacken, hee harr 13 Goldbütt un 6 von de grod Steenbütt hatt. Wie leppen beide beed nördlicher aff, un deen weer naa O.S.Osten to utsetten.

Aug. Krus wor bie ¾ Stünn wer fast, wie fischten noch knapp 10 Minuten wieder, do worn wie ok fast. De Drift bröög uns 1 Stieg grod Goldbütt un 8 Stück vun de grod Steenbütt, Krus harr 17 Goldbütt un 6 Stück von de grod Steenbütt hatt. Wie deen sick beide op dütt Fangplatz, een goden Fang an Steenbütt tosaam fischen, opglieks de letzten beiden Drifts man jedesmaal 2 vun de grod Steenbütt in’d Nett weern.

Ümm de Klock 9:00 Obends leepen wie mit beide Böö naa Kiel an’d Fischmarkt, un weern Morgens ümm 5:00 ganz alleen dor. Wie deen 125 ℔ grod Goldbütt un 369 ℔ Steenbütt, 85 ℔ Dösch un 34 ℔ Platen loschen. Aug. Krus 132 ℔ Goldbütt, 362 ℔ Steenbütt, 110 ℔ Dösch un 23 ℔ Platen löscht.

Vör de Goldbütt kreeg’n wie 92-25 Penn, vör de grod Steenbütt von 1-1,10 Mark, vör de Dösch 12 Penn un vör Platen 22 Penn dat Pund, dat weer een Fang vun 464,00 Mark. Aug. Krus sien Fang weer 472,00 Mark.

Aß wie Rohöl un Schmeeröll übernahm leepen wie ümm 11:00 naa Eckernför to ut.

De nächste Reis naa’d Fangplatz to weer vergebens, deen dor 2 Drifts mit paar Goldbütt un paar Dösch über ohne een Steenbütt, leppen vun dor ½ Stünn wieder, naa de Belt rinn, un fischten dor naa Goldbütt, de dor ok heel knapp weern: 1-1½ Stieg in Drift. Wi fischten 2 Daag ümm een lütt Fang to krieg’n, Aug. Krus göng’n dat genau so.

In de Oktober heeft, wie dat nochmaal op dat Fanggebiet versööcht, weer op 4 Zentner gr. Dösch 1½ Stieg Goldbütt un 3 Steenbütt in een ganze Dag de wie dor fischt.

In de nächte Sommer deen wie een paarmaal op dat Fangplatz versööken mit nichts. Een Reis utgang vun de August, deen wie weer mol versööken, un harrn as schien Glück, de Dag deen wie sick 180 ℔ Steenbütt un 65 ℔ Goldbütt dor tosaam fischen.

Leepten vör de Nacht naa Fehmarn to, göng’n affkannt vun Wester-Markelsdörp vör Anker. Wi wull’n de anner Dag, op dat Placken tofischen, ümm de Klock 5:00 deen wie all weer naa Westen to utsetten.

Wie fischten een ganze Stunn ohn fast to warn. As wie ophohlten, weer’d een Enttäuschung: 5 Goldbütt, 6 Dösch un een paar Platen, keen Steenbütt, deen trotzdem nochmaal op Gegenkurs fischen, de Fang wie vörheer keen Steenbütt.

Wat nu, wie deen hinn un heer Snacken. Ick de een Vörslagg maken: „Wie sünd hier dichtbie, laad uns doch mol een Drift op de 6½-7 Faden ünner Markelsdörp op de Kleewergrund maaken, wie heeft dor doch vör 2 Johr in de Harvst dat Glück hatt, sick dor een schönen Fang an Goldbütt weggtoluurn.“

„Jo,“ seggt Frie Mumm, „dat weer over in de Oktober naa de Driefnettfischerie!“ Ick segg: „Jo dat weer so, over laad uns dat man versöcken!“ Mien Vadder meen ok, dat wie man een Drift mol reskeern sull’n.

Wie leepen op Ostkurs beed de Markelsdörper-Füürturm über de Pedersdörper Kark weer, leepen noch beed aff, un löön sick 13 Meter Waader an, deen utsetten naa O.S.Osten to, fischten een Stünn ohne Stöörung, wie harrn man 80 Meter Schleeplien vör de Scheerbree, rubbeln über de Kiesgrund de dat ebenwegg.

De Drift bröögt 1 Zentn. 1-3 ℔ d. Stück an Dösch, 2½ Stieg grod Goldbütt, 5 Stück von de grod Österrieker vun 1½-2½ ℔ d. Stück mit er grod Köpp, de wie glieks weer über Bord smidden, de weer nie to verköppen un irst rechtnie to geneeten.

Op dütt Streemel Fischgrund, deen wie noch 5 Drifts maken, de uns noch 10½ Stieg gr. Goldbütt, 2 Zentner Dösch un 75 ℔ Platen bröögten. De letzten Drifts weern man wenig Goldbütt meer dor mang, so harrn wie dat lütt Placken reinfischt. Ümm eben naa 4:00 deen wie’d Feld verlaad’n un leepen naa Kiel to.

Öfter versööchten wie op dat Steenbüttgebeed mit een Drift, over leider ümmer vergebens. De ganze Goldbüttfischerie, weer de letzte Johrn ümmer erfolgloser worn, dat de mol vorkaam, dat een oder de anner sick een lütt Fang tosaam sammeln de.