1928 Anfang Oktober

Över 14 Daag weern wie mit 12 Böö ut Eckernför bie de Driefnettfischerie in de Grodbelt. In de Tied sünd ganz gode Fänge von 1-2500 ℔ op Boot makt warn. Wie sölbst weern düssen Dag mit een Fang von 1340 ℔ an'd Markt wähn un leepen ümm ½ 11 Uhr wer ut naa de Belt to mit mehrere Böö, de een ½ Stünn später ünner weggs, beed op Chr. Lorenz, de een knappe Miel achter uns torügg leeg.

De See weer speegelblank, aver dat weer een lurig un brütige Luft. Aß wie god 3½ Stünn unnerweggs weern, keem mehrmals een stiefe Keep över'd Wader hüddeln – mahl vun Südost, denn mahl ut de Nord. Wie sehn, dat de Böö beed op Chr. Lorenz achterrut ümmer mehr ut Sicht keem. Jedenfalls harr'n se de lurige Witterung mit de Keepen op'n in Kieker kreegen un weern ümkehrt.

As wie Gulstav-Klimt dwars harr'n, weern wie wull 4-5 Mieln von'd Land aff. De dänsche Fischerflott weer mehr naa de Belt rum un neeger naa de Küst vun Langeland rann. Ick seh an Stürbodsied vorut, een gode Miel vun uns aff, över'd Wader een Masse Vogelwark in de Luft. Dor unner weer dat ganze Wader in een lange Streif dunkel un in Bewegung. Sonst weer dat ganze Wader speegelblank, bloß de Wulken hung'n deep daal.

Ick reep mien Macker. He seggt, lop dor man mohl opto. Aß wie neeger rann keem, sehn wie, dat weern all Tümlers de dusende – so wat harrn wie noch nie sehn. Wie bleem bie 200 mtr. vun se aff un leppen langsaam naa Norden to, se wie die Tümlers trecken deen. De Streifen, wo se lang un hinn in heer wöllten, weer över 1000 mtr. lang um bie 5-600 mtr. breed. Dat Vogelwark, wo ok de dusende von in de Luft weern, stürzten in een Tour in't Woder rinn.

Chr. Lorenz keem noch bie uns langsied un meen, dat weer een Naturereignis, denn so wat harr'n se ok noch nie beleevt. Wie sproken noch tosaam över de Tümlers, dat se jedenfalls achter een grod Schwarm vun Heern heer jagt, de naa de Belt rumtrecken deen. Mien Macker seggt noch so: jedenfalls hätt dat ok wat mit de Witterung to dohn, de her över de Belt ling'n deiht. Chr. Lorenz seggt ok, dat so wie so.

Beide leppen wie naa de Nord to, so dat wie 1 Miel von de Tümlers aff weern. Hier fung'n wie an, nan de Süd to uns Netten uttosedden, so dat de Tümlers liek op uns Netten to keem. Chr. Lorenz lepp noch ungefähr 1 Miel wieder naa de Belt rinn.

As wie ferdieg mit sedden, war'd ok all bald düster. Wie deen noch beide över de Witterung snack'n, dat dor irgendwat achter sedd. Deshalb deen wie uns Segel mit 2 Reffs inrollen, uns Motor ledd'n wie vörsichtshalber op blind lopen, int Fall wenn sick dor unverhofft wat Entwickel'n sull.

Wie weern grad mit uns Abendbrot ferdie, do rucks dat mit eennaal in uns Löpper, de vun'd Boot naa de Netten de Verbindungslien weer. Ick keek ut de Kapp rut. De Nordost weiht een Kohsturm vun de Belt daal. Keem glieks de See anloppen, as wenn die Nordost kaum in de Belt all lang'n stahn harr.

Wie deen uns klaar maken ümm uns Netten wer intotrecken. De Netten wüll'n wie doppelt, wie Büttgarn intreck'n. Dat harr'n wie sick all affmakt er dat Theater los göng'n. Ick kunn mien Macker bied intrecken nie helpen. Harr nugg to dohn, mit Motor un Stüür, bie dat langsame geg'n de swöre See an gahn, ümm dat Boot op de See to hohl'n. Müß verdammie oppaßen, dat in Düßtern, bie'd treck'n alln's klaar güng'n, den dat beed Lichtschien keem vun uns Ankerlatern, wo ick een lüttbeed sehn kunn, wie de Netten stahn deen un wat sick an Deck bied intrecken mit mien Macker affspeeln de.

Dat weer swöre Arbeit vör emm, överhaup wo dor noch rech paar Heern op de Netten sedd'n, de vun Stück to Stück mehr warrn. De See waar ümmer mehr. Paarmohl steck uns Boot de ganze Näss wegg, aß wie dat halbe benidst an Bord harr'n. Deen wie de anner Netten op Backbordsied in hohl'n. Dat güng'n beeder leeg wull mit an de Strömung. Op de letzten Netten sedden een Masse Fischwark op.

Ümm ½ 11 Uhr harrn wie alln's glücklich an Bord un leppen mit Kurs naa Eckernför to. Deen uns Smack Segel sedd'n, dat weer god, dat wie vörher all de Reefs indreiht. Na de Lichter vun Chr. Lorenz, weern de noch nie bie to trecken. Dat affstecken vun de Netten weer bie düsse Witterung nie möglich. Dat weer Rabensworde Nacht. Bie sun Wetter mit 2 Mann, weer dat gornie so eenfach, dat alln's klarr gahn de.

Geg'n 5 Uhr, as dat daag'n wull, nehm de Wind noch mehr to. Op wie lang Holt passeert, füng'n wie an de Heern afftostecken. Üm 6 weern wie in Haab'n bie de Holtenbrügg fast. Bied affsteken kreeg'n wie help, dat göng'n bie de grod Heern flott wegg. Uns Fang weer 1550 ℔ un kreeg'n op de Aukschoon 25 Penn dat ℔.

As wie mit löschen ferdie, brögten wie uns Netten naa'd Stöttenplatz hinn to dröög'n. Chr. Lorenz keem irst bie 10:00 herümm. De weern irst ½ 3:00 anfung'n to trecken. Dor weer de Nordost een beed afflaut. Weer bloß vör een halve Stunn, naasten harr de Wind wer mehr tonaam. Hee vertell, dat de Kraam gornie so eenfach wesen weer mit all de Heern op se. Harrn een Fang von 3180 ℔.

Wenn'd op düsse Reis een beed vernünftige Witterung wenn weer, harr'n wie ok noch een grödern Fang makt, denn uns Netten weern jo man vun een halv beed to 1½ Stünn in'd Woder wehn. Wie fischten mit 16 Netten un Chr. Lorenz harr 24 Netten ut hatt un harrn 7-8 Stünn in't Woder stahn. De Driefnettfischerie weer mit düsse Tour irstmahl naa de Belt hinn beend.

8 Daag weer'd heer mit uns letzt Tour naa de Grodbelt. Un de Nordost-Utscheeder, de ganz Tied weer god Wetter ween, un hüüt weer weer sun Witterung. An de Brügg deen wie dorvon snacken, op nie ok to Veisnitz. Nun de grod Harvstheern to fang'n weern. Aug. Kreutz meen, dat wör so op een Versöck ankomm. Mien Macker segg, dor weer hüüt Naameddag de best Gelegenheit to, denn lang'n könnt wie nie mehr föhrn. De Tied iss sunst vörbie.

Sien Broder Johann segg, dor harr'n wie düsse Dag man maal op tostelln süll'n. Mit 5 Böö wulln wie dat mal to Veisnitz versöken. Naa de Meddag sull'd losgahn. Mien Macker un ick harrn sick affmackt üm 1 Uhr an de Brügg bie uns Stötten to wähn, um de Netten afftonehm. De Witterung weer god mit een flaue Südwest.

Ünnerwegs deen wie uns Netten insteen. Üm ½ 2:00 leppen wie ut. As wie een Stück budden Bookniß weern, wor dat totstill. De Luft harr sick vun de Süd heer betruken. Dat weer recht brudig worn. Mien Macker meen, hoffentlich ward nie wer sun Theater, wie de letzte Tour. Ick segg noch so, dat muß denn jo en merkwürdig Tofall wähn.

De anner Böö weern uns all achter naa komm. As wie an de Veisnitzer-Rönn weern, kunn wie de 4 Böö noch sehn. Ick segg to mien Macker: “Wat meenst to de Luft dor över „Ärö“, de dor optrecken deiht? Wöllt hoffen dat dor nichts achter versteeken iss”, segg hee. “Kiek over mohl naa uns Kameraden.” Ick seh bloß noch een Boot. De kümmt over ok nie neeger, iss graad as wenn dat Boot still liggt.

Wie weern sick eenig, dor wie eenmaal hier sünd ok utsedden. So deen wie sick de 18 mtr. an Loten un deen vun dor ut naa Südwesten to utsedden. As wie ferdie harr'n, wie 20½ mtr. an'd Lot. Uns Segel harrn wie sicherheits halber, weer beed een lütt Smack inrollt. De Motor ledden wie weer blind loppen, deen sick wer op alle Möglichkeiten instell'n.

Üm de Klock 8:00 keem de Wind flau vun Nordost. „Ick heev't sun Ahnung,” segg mien Macker, „dat wie wer nie ungeschorn dor vun koomt”. Deen noch een löpper von 30 Fad'n klaar maken mit een Strupp över, wo een 40 ℔ Lot an weer. Dee wen'd wer swöre See lepp, de Kraft twischen Boot un Netten mindern sull.

Üm ½ 9:00 weer dat so wieht, de Nordost nehm ümmer mehr to, ebenso de See. Bie 9:00 rümm fiern wie de Löpper mit dat Lot op ut. Wie deen vun Tied to Tied ümmer mehr utstecken. De See wor so groff, dat uns Boot de Näss wegg steek un wenn hee wer hoch keem, dat Lot ut Wader pietschen de. Sun Druck weer twischen Boot un Netten. Wie stünn beide parat in't Roorhus.

Üm 10:00 keem vun Osten, naa de Lichterförung een Damper lang de Röön naa Nordwesten toloppen. As hee dwars vör uns, de hee mit een Scheinwerfer uns anlüchen un bleff. Wie uns vör keem gestopt ling'n, dat Fahrtüch de sick mit de Scheinwerfer sölbst belüchen, so sehn wie dat een minleeger weer. Hee hätt ja sach mol sehn wull'n, wat dor vun Gespensterische Lichter rümmer danzen deen, denn uns Boot göng'n dör de swore See beeslich to mehr. Dat Fahrtüch leep man een kort Tied wieder op sien Kurs naa de Flensburger Föör to.

As wie eb'n vör ½ 11:00 uns Lot över Bord smedden, harr'n wie 17½ mtr. Dornaa göng'n de Strom naa de Lüttbelt to, ungefähr lieksen geg'n de Wind op. Dat weer keen Wumer, dat dor sun swöre See lepp un so veel Kraft op uns Netten weer. Denn de See weer veel gröffer, as vör 8 Daag in de Grodbelt.

Üm Klock 11:00 füng'n wie an to trecken. Weer so wie in de Belt, doppelt in un vun achtern naa vörn to. As mien Mackers beide Löppers inhohlt, kunn hee so bie blieb'n. Denn de irste 6 Stücke Netten weern dörch de Kraft un de swöre See opspunn wie Tauwark mit een paar enkele Heern dor twischen. Dat 7 Stück weer bloß an de scheed beed oprollt, sunst weer'd klaar wie all de anner Stücke ok.

De Netten stünn ok ja man annerhalf Fell ünner de Oberfläch vun't Wader, weil de Heern üm düss Tied so hoch naa de Oberfläch to lopen deen. De klaare Stücke brögten een paar Wall Heern op Stück. As wie uns Netten an Bord, seggten wie beide bloß „Gott sei Dank“, deen uns Smack Segel sedden, un aff göng'n dat naa Huus to.

As wie geg'n Bookniß weern, weer dat so as wenn de Wind mehr naa Norden gahn weer un ok beed afflaun de. To marken weer'd as wie binn Langshöft keem. Bie ½ 5:00 deen wie geg'n de Fischerstraatt fast maken. Dat Wader weer heel hoch, man een ½ mtr. ünner Bullwark, aver keen Seegang. De Wind keem aff un an mol mit een Keep vun Bord över muddeln, so nördlie weer se gahn.

As wie eb'n fast, keem Thetje Mahrt an un wull uns Fang vör 25 Penn dat kopen. Wie deen emm mit nee antworten. Wie wüllt irst dat Fischwark vun de Netten affsticken. Hee weer vertörnt, dat wie emm uns Fang nie verkoppen wull'n. Denn hee segg noch so fünsch, op de Aukschon krieg jie keen 20 Penn.

Op uns 10 Stücke Netten de klaar wesen weern, sedden noch 480 ℔ vun de god Heern op. So bie Klock 7:00 keem Joh. Büll naa uns hinn, bekeek sick de Fang un segg

: “Laad mie de Fang krieg'n, ick geff ju 45 Penn dat ℔.” “Wat meens,” segg mien Macker to mie. Ick segg: “Dat is keen slegg Angegebot, den iss uns Möh doch nie ganz ümm sunst wähn.”

De 6 Stück Netten de opsspunn weern, deen uns noch allerlei Arbeit maken. Mien Vadder un ok Mumm deen uns noch mit help'n, so weern wie eb'n vör Meddag ferdie.

Dat war vör dütt Johr de letzt Reis mit de Driefnetten. Wie harr'n erstmaal de Näss vull. De letzten beiden Reisen harr'n dat in sick hatt, dat kunn sick so helpen.

Fr. Daniel