De ool Fischer Korl Rehbehn harr in de 90er Johrn 8 Fischerknechten, all Jungkirls, in Lohn und Brot. Hee wohn in de Achterstroot. Sien Gewees güng dörch bit an de Rosengang. Door harr he sick een Loogerie hinbuut.

Eem Kupperkedel vun 500 Liter Inhalt weer fast inbuut und mit een groot Füerlock versehen. Een Afflussrohr mit Verschlußventil güng dörch de Muur noh buten, doormit de kokenhitte Loog in een groot holten Troog, de bi 3 m lang, 60–70 cm hoch und 80 cm breed weer, rinlopen kunn.

De Loogerie stünn de ganze Fischerie to Verfüügung. De kunn door ehr Handwaden und ok ehr sünstiges Geschirr loogen.

De Loogkedel gegenöver weer en 8 qm groot Basseng ut Zement as Afflegruum för de geloogt Waaden. De Footborrm weer mit een starke holten Greeting beleggt.

Wenn een Waad loogt weer, so wurr se int Basseng inschoten, dat heet vun een Enn ton anner Enn op een Hoopen, so to seggen, opstopelt, dormit de Loog afflecken kunn. So weer dat möglich, 3–4 Waaden op een Dag to loogen und ok to logern beet to de nächste Daag, wo de Waad op een Woog lood und nah de Dröögkoppel bröggt wurr.

De Netten, de meistens ut Boomwull weern, wurrn loogt, üm se to imprägneern. Mehrmols in de Saison müss dat vör sick gohn, dormit dat Nettgoorn nich verrotten dee. Bi't Loogen wurr doormols Katliko („Terra Japanica“) benutzt, ebenso Eeckenextrakt as Garrstoff, mit rotbruune Farwstoff vermischt.

Sämtliche Netten ut Boomwull, egal wat för Gattung, mußten vör't Verrotten loogt warrn, denn de Netten weern in de Johrn wie ümmer för de Fischer kostbare Objekte.

De Loogerie is noch beet in de Twinniger Johrn in Bedriew wesen. Een Loogerie leet de ol Johann Dibbert sick bi sien Huus op de Uhlnkoppel buun.

Ebenso de Ringwaadenfischer leeten sick een groot Loogerie mit twee Kupperkedels, een vun 1000 und een vun 500 Liter, an de Köhlnschuppen, de mol John Clausen hört hett, buun.

Dütt weer een lütt Erklärung över de Nettenloogerie.