S. 870

Anfang Oktober 1926. Wi fischten ünner Laaland naa Gold- un Struffbütt wie naa Dösch, denn överall op de Fangplätze weer de Fischeri naa Goldbutt heel kümmerli un de Priese an’t Fischmarkt leeg vör de grod Goldbutt ok man bi 60 Penn dat Pund, dorgegen de Dösch, wenn se lebennig keem, veelmols an de 20 Penn un doröver för Dösch vun 2-5 Pund dat Stück.

Wi harrn de heele Dag bi een gode Witterung fischt. De Fang weer ok man mau. 10 Stieg Goldbütt un 14 Stieg Struffbutt fungn aver 150-180 Pund Dösch mit hatt. Naameddags ümm Klock 5 keem een Boot vun Westen her op uns tolopen, dat weer Ernst Plambeck mit sien Macker Karl Busch ut Laboe. Wi deen miteenanner snacken. Se froogn, wat wi fungn hefft. Se see: „Wi wullt hüüt Nacht op 8 Faaden naa Dösch fischen.” „Wat?” see mien Vadder, „Bie de Raabenswartnacht?” „Jo Willi”, see Plambeck un sien Macker, „graad dat is hier de beste Fanggelegenheit ünner Laaland naa Dösch.” „Jo”, see mien Vadder, „aver bi Mondschien!”. Dor see Karl Busch: „Nee, dat mutt so swart ween, dat man nie weed, iss man noch an Deck, orrer büst all butenbords.” Dor see Fide Mumm:

S. 871

„Dat warst aver marken, Korl, wenn du mit de Fööt in’t Waader kümmst. Wie wüllt naa Fehmarn to un dor för de Nacht to Anker gahn.” Dor sä Ernst Plambeck: „Bliev man hier un versöök een paar Drifts, wer weet wat morgn iss, denn dat Barometer fallt jümmer mehr. Irgendwat iss dor in de Luft!” So bleeven wi dor un deen mit Plambek tosaam naa’t flachere Waasser naa Norn to utsetten. Wi harrn de irst Drift wohrhafti bi 300 Pund Dösch un een gode Stieg Struffbutt. Plambek harr naa uns Meenung nochmaals op de sölbe Kors utsett, wie deen op Gegenkors weer utsetten. De Drift bröög uns 500 Pund Dösch mit 1½ Stieg Struffbutt dorto. As wi weer utsett harrn, keem Plambek bi uns an un dee fraagn, wat wi hatt harrn in beede Drifts. Wie seggten emm dat. Plambeck see: „De irst Drift 3½ Zentner. Wi harrn nochmol över de sölbe Boog utsett, sünd aver bi een halbig Stunn fast warn, dor weern an Dösch man 1½ Zentner bin. Bi nächste Drift weern wi naa een dreeveertel Stunn weer fast, dat weer de förste Haahnpot. Wi mööten ok een ganze Tied dorbi rümackern, er de Kraam losgahn dee. De Drift bröög weer 300 Pund Dösch un 1 Stieg Struffbutt.” Intwischen harr de Wind rech beed tonaahm,

S. 872

wull 3-4 ut West-Südwest. Wi deen weer op Gegenkors utsetten. Bi düsse Drift dee de Wind jümmer mehr tonehm. As wi een Stunn fischt hefft, keem Plambek weer op uns tolopen un verteel dat he in 1½ Stünn 8 Zentner hatt harr. „Wi deen glieks weer utsetten,” see Plambek, „un warn na de kort Tied weer fast. Wi heef uns Zees dorbi sidden laaden, dat weer enfach nie möögli, de Kraam lostokreegn. Toletzt versöögten wi dat mit de Motor, een Rucks un wegg weer de Bescheerung. Dat is jedenfalls een ol Wrack ween, wovun hier noch mehr lingn dee, denn beede Liens sünd vör de Haahnpoten affridden. Wi wullen ju blots seggen, dat Barometer is weer een Stück wieder in de Keller rutsch, de Wind nimm to, wi wüllt seihn, dat wie naa Huus to kümmt.” Wi seggten, dat wie ok utscheen un naa Huus to wulln.

Plambek sien Boot weer een halbig Meter länger as uns Boot, he harr sick sien Boot bi Götsch in Hiligenhaab’n buun laaden un harr een 20 PS vun Neufeld un Kunke in, wi harrn een 10 PS vun Bauer-Lage in. De West-Södwest harr in de letzt Stunn tonahm vun 5 to 6. Wie mööten lieksen ? gegen de See anboxen. Plambek leep een Bootsläng vör uns, so dat he de See vör uns all een beed breet plaun dee. Dat weer

S. 873

bi uns to marken, aver liekers kreegn wi noch veel to veel vun’t Waader över. Plambek harr een Roorhuus op, wi mööten dat so över sick weggahn laaten, wat op uns tokeem. Wi harrn sick een Fischkist vör uns henstellt, je hööger wie naa de West rop keem, je mehr neem Wind un See to. Wi deen glieks marken, as Plambek sien Motor langsaamer gahn leed, dat wie uns Motor wat affdrosseln deen, so dat wi jümmers in sien Paat ? Bleeven, beed dat wi binn vun’t Bülker Füürschipp weern, dee Plambek för uns weggmarscheern. Dor deen se mit een Latern naa de Kieler Föör towinken, ümm dormit Bescheed to geeven dat se naa Laboe to heeln. De Wind weer een beed naa Westen trüchlopen, wie beheeln uns Kors bi naa Rüggeneck (Dänisch-Niendorf) to. So weer de See jümmer weniger, dat dee ok anfangn to daagn. As wi in uns Föör rinnleepen, deen wi lang de Süd innfohrn. Ümm Klock halbig acht weern wi bi uns in Haaben. Dat weer een Reis, de dat in sick harr. Wi weern all dree klöödern natt beed op dat Fell. Dat weer noch graad to rechte Tied ween, as wi sick mit Plambek tosaam op de Sööken maakt harrn. Weer he ni de ganze Reis vör uns wegglopen, ward dat noch veel slimmer warn.

Fr. Daniel