Die nachfolgenden einzelnen Berichte sind außerhalb des alltäglichen, die besonderen Erlebnisse und Geschehen bei der Fischerei die für mich bemerkenswert waren. Wie es manchmal auf See bei schlechtem Wetter war und sonstiges. Fr. Daniel

S. 857

Die in diesem Heft geänderte Wörter sind von mir unternommen Fr. Daniel

1926. Wi deen Nachts naa de Fehmarnbelt in See steeken, mit noch söß Böö mehr. Bi de irst Drift in de Belt keem över Fehmarn een Gewitter optrocken. Man een Dreeveertel Stunn güng dat Unwetter mit Hagel un Regen un een Barg Wind över uns wegg. Wi deen seihn, dat uns Mackers er Gescherr opholten un naa Marienleuchte toleepen. Wie wulln uns Drift solang gahn laaten, beed dat Unwetter vörbi iss un wie sick dat Wetter naaher entwickeln dee. As wie uns Gescheer opholten, sprung de Wind vun Südwest mit eenmaal op Nordwest 6-7. De Fehmarnküst keem weer in Sicht. So seihn wi, dat all söß Böö naa Staberhuk toleepen. Jedenfalls wulln se naa Burgstaaken hen. De Drift harr uns 4 Stieg Goldbutt bröögt, ni veel in 1½ Stünn. Uttosetten weer dat keen Witterung mehr naa, so lepen wie naa de Preesener Bucht to un güng dor irstmaal to Anker. Bi Klock 11 rümm weer de Wind beed flauer un wie leep op Westen trüch. Wi sproken miteenanner över Kathrinenhoff. Dor muss dat eegentli gahn, wenn de Wind so bliem de, ick steeg in’t Maschinruum un warm uns Motor an. As de Motor in Gang weer, holn wi uns Anker op un deen naa de Preesener Bucht tolopen. Wi deen sick 24 Meter anlöön un setten uns Gescheer na Südosten ut. Dat weer verdammt noch spökeli hier aff. Je wieder wi nach Kathrinenhoff tofischten, weer de See all recht beed weniger, de Wind keem vun Westen 4-5, bi 1½ Stünn holten wie op mit een Fang vun 3½ Stieg grod Goldbütt,un een grod Steenbutt vun 8 Pund. Naa uns Meenung weer de Fang ni slecht. Wi kunnen her beed düster warn fischten. Wi maakten ungestört noch veer Drifts, de uns 14 Stieg grod Goldbütt un 7 grode Steenbütt vun 7-9 Pund dat Stück bröögten. Vör de Nacht güngen wi ünner Kathrinhoff to Anker, mit 22 Stieg Butt in de Bünn. Hoffentli kunnen wi sick de anner Dag noch een paar Drifts weggluurn. De anner Morgen ümm Klock veer güngen wi Anker op. Dat weer een Smuddelwetter, de Wind keem ut Südost 3-4. Ümm eben vör Klock halbig 5 deen wie Nordwest utsetten, naa 1½ Stünn holten wi op mit een Fang vun 3½ Stieg Goldbütt un 2 Steenbütt vun 8 Pund dat Stück. De Wind güng

S. 859

mehr naa Westen, nehm over weer to, wie deen beed Obends dörchholn, denn jeede Drift bröög een Fang vun 3-4 Stieg un 1-2 grode Steenbütt. Naa Klock 4 leep de Wind jümmers mehr trüch, beed op naa Süd.

Wie harrn sick düssen Daag 31 Stieg Goldbütt un 10 Stück vun de grod Steenbütt mit noch 210 Pund Platen tosaamfischt. Mit de südliche Wind leepen wi dör de Belt, vun Wester-Markelsdörp güngen wi bi mit Kors naa Todendörp to, naa god 1½ Stünn nehm wi Kors op de Kieler Föör to. As wie morgens ümm Klock 5 an de Seegaarnbrügg fast maakten, weern wi ganz alleen mit Goldbütt an de Markt. Uns Fang weer 53 Stieg Goldbütt, 18 Stück Steenbütt un 190 Pund Platen vun beide Daag. Dat weer een godes Ergebnis, wenn de Pries henhau, so harrn sick de beede Daag mit dat stürmische Wetter, wo all de anner Böö sick in de Haab’n leegn doch lohnt. Vör uns grod Bütt kreegen wi 75-85 Penn, vör de Steenbütt 90 Penn beed een Mark dat Pund. De Platen bröögten 25-28 Penn dat Pund. Wi nehm noch Rohöl un Smeeröl över, deen uns Affreeken un Geld holn, betaalten de Betriebsstoff un leepen ümm Klock halbig 12 naa

S. 860

Eckernföör ut. Vun Bülk beed na Staberhuk op de Nordkannt vun uns Föör weer dat noch een polterig Reis ween, denn de Nordwest weih mit Windstärke 6-7 un in de Flaagen noch mehr. As wi de Nord irst neeger keem, wurr de Witterung vör uns beeder. Bi Klock 4 rümm maakten wi an de Holtenbrügg fast. Dat weer uns irste Tour mit een goden Fang, wo uns Mackers vör slecht Wetter in Haabn leegn. Naa twee Daag harrn wi weer torüst, ümm Klock teihn seilten wi los naa Fehmarn daal. De Gelegenheit weer god, ümm Rohöl to spaarn, de Nordwest, de kööl stief mit 5-6. Wi steekten een Reff in’t Grodsegel, den mit de Flaagen keem een Barg Wind. As wi dwarsaff vun Todendörp weern, dee de Wind affflaun un leep mehr un mehr naa Südwesten trüch. Gegen de Wienbargen keem de Wind all ut Südwesten un weer op 3-4 afflaut. As wie dwarsaff vun Heiligenhaabn weern, deen wi uns Motor anwarm, op de anner Sied vun de Sund weer de Wind een reiner Süd un dat fung an to Nieseln. Mien Vadder dee noch seggen, dat is graad keen Teeken för beedere Witterung, ümm halbig 6 leepen wie in Burgstaaken in. De heele Haabn leeg vull vun Fischerböö. Wi seihn uns Mackers P. Kolls un J. Dankwardt in de westliche

S. 861

Eck lingn. Wie güng be se langssied, se leegn mit all de anner söß Böö nu all söß Daag in Burgstaaken. As jümmers güng de Fraageri los, wo wi heer keem. Wi deen se vertelln, dat wi vun to Huus kaam deen, wo wi twee Daag weern. De irste Dag, as ji hier in Staaken leegn hefft, hefft wi een Daag to Kathrinhoff fischt un een goden Fang maakt. Dor meen August Kreutz: „Ji wüllt uns wull gern op’n Arm nehm!” He dreih sick ümm un dee naa sien Boot gahn. Wie hörten noch, wie he to Hannes Lietz sä: „Morgen ward’t weer datsölbe.” Wie harrn bi’t daalseiln dorvun snackt, wenn’t man so passen sull, dat wie Süden aff vun Burgstaaken de Burger Kark över de Glambek versööken wulln. Uns Meenung weer, dat dor lang keen fischt harr. Mit de Gedanken güng wie all dree üm Klock halbig 9 to Koje, dat weer nämli een böös Schmuddelwetter. De anner Morgen ut de Kapp, un seggten: „Dat nieselt noch, de Wind is beed flauer as Gesternobend, wüllt wi dat mol riskeern?” „Jo, wenn’t ni geiht, lop wi weer in.” Wi keem in de Been un trocken sick an, ick dee naa achtern gahn, warm uns Motor an, Frie Mumm sett de Kaffekedel op.

S. 862

Mien Vadder dee uns Gescheer klaarmaaken, dör dat Gepolter bi uns an Deck keeken uns Mackers ut er Kapp rut, deen mit Vadder snacken un meen, wie weern jo wull verrückt, bi so’n Wetter lostofohrn, dat duur keen twee Stünn denn weiht dor weer een Sturm un ji sünd weer in Haabn. Fide Mumm sä: „Wie wullt blots een Drift maaken, dormit wi wat in de Bünn un ok wat in de Pann hebben, wenn wi womögli hier ok noch länger lingn mööt.” Ümm Klock halbig 5 steeken wi in See. As wi ut dat Lock keem, stünn dor een krappe See un de Südosten köhl stief. Ut de Sund keemen dree Böö mit Seils op na’t Lock vun Burgstaaken tolopen. Wi leepen een Stunn Süd-Südost aff, smeeten uns Lot ut, harrn 21 Meter Waader, deen glieks uns Gescheer op Süden to Ostkors utsetten. Dat weer noch heel spökeli, aver de Wind harr bannig affflaut gegen de Tied. As wi ut Lock keem, naa 1½ Stünn, war’t so flau, dat uns Seil dör de polterige See hen un heer slaagen dee. Bi 1½ Stünn holten wi uns Gescheer op, weern doch gespannt, wat de Drift wull bringen dee.

S. 863

As wi de Zees inholten, seeten mehrere Bütt in de Edies (Edies: Abgenähte Ecken im Netz) ok leepen noch paar Bütt un Platen in’t Ünnerblatt vun de Zees. Wie mussten een goden Quast övernehmen. De Drift bröögt 6 Stieg Goldbutt, 1 Steenbutt un 40-50 Pund Platen. Dat weer en godes Ergebnis, wo wi ni mit reeken harrn. Wie deen glieks weer op Gegenkors utsetten. De Drift bröög datsölbe Ergebnis. De Witterung weer vun Stunn to Stunn beeder warrn, ümm Meddag dee de Luft opklaarn, de Sunn schien, un de Fastlandküst, wi ok Fehmarn keem in Sicht. Wi deen uns wunnern, dat nirgends een Fahrtüüg to seihn weer. De Schosteenrook vun de Dampmöhl in Burgstaaken dee kort över de Schosteen sick affbiegen, dornaa muss över’t Land een stief Wind stahn. Dat weer denn ok wull de Ursaak, dat nirgends een Boot to seihn weer. As dat sichtig ward, fischten wi sick naa de Steenkant ran, de Drift bröög 1 Stieg mehr as de ersten Drifts un de Bütt weern noch rech beed gröder. Wi deen sick beed Klock 7 55 Stieg Goldbütt, de 15-16 Pfund dat Stieg weeg’n, 7 Steenbütt, un 350 Pund Platen tosaam fischen. Ümm Klock halbig 8 leepen wi vun’t Fangplatz naa de Fehmarnsund to. Uns Seil harrn

S. 864

Wi ümm de Meddagstied all dicht maakt. As wie in de Sund rinkeem, dee dor een stiefe Westwind weihn. Bi’t Seilsetten lee uns Boot sick rech in de Kant. Dwarsaff vun Heiligenhaabn keem de Wind ut Südwesten 4-5 un dee över de Howachterbucht anhol’n. As wi Todendörp passert harrn, flau de Wind noch mehr aff, beed gegen Schönburg. Dor keem de Wind mit een Regenslaag weer ut Westen un nehm ok weer mehr to.

Ümm Klock 5 leegn wi bi de Seegaarnbrügg an’t Fischleeger fast, wie weern weer da eenzig Boot mit Bütt an de Markt, de Pries vör’t Fischwark weer ungefähr de sölben as bi de letzte Tour.

Dat weer uns tweed Reis, de wi maakten, wo uns Kameraden vör Wind in Haaben leegn. As wi Brennstoff övernahm un uns Geld holt, güng wi to Stadt, ümm Proviant to köpen. Naadat deen wi in de Swienskeller Swiensbraadn mit Rotkohl eeten, wat uns god smecken dee. Üm Klock halbig 2 leepen wi vun Kiel weer ut naa Fehmarn to, een stiefe Nordwest 4-5 püster uns langdaal beed mehrnop vun de Howachter Bucht. Hier fung dat an, dat de Wind afflau un mehr op Südwest dreihn dee, ümm Klock 8 deen wi vör de Sund an de

S. 865

Fastlandsied vör Anker gahn. Bi Mehrnacht fung dat an to regen, dat dee recht op Deck prasseln. Gegen Morgens ümm halbig 5 dee dat noch Nieseln, dat weer heel diesig. Wi güng Anker op, leepen dör de Sund naa de Blenker ? to, vun dor leepen wie een gode halbig Stunn Süd-Südost aff. As wi an’t Lot 20½ Meter hemm, deen wir uns Gescheer op Süd zu Ostkors utsetten, deen bi 1½ Stunn opholen. De Drift bröög 5 Stieg Goldbutt un god 30 Pund Platen. Dat weer een heel ruppige Witterung mit Wind un Regen. Wi deen noch een Drift över de sölwig Boog maken. De Drift bröög god 6 Stieg Bütt, 1 Steenbutt un 40 Pund Platen. So deen wi uns Gescheer weer op Gegenkors utsetten. De Luft dee sick allmählig opklaaren. As wi Land un Landmarken seihn un utmaaken kunnen, deen wi weer mehr naa de Steenkannt tofischen. De Drift harrn wi 7 Stieg Bütt, 2 Steenbutt un bi 40 Pund Platen, wo eenige von de grod Tungplaten twischen weern. Wi deen op Südkors utsetten un fischten een Stunn un 20 Minüten, dor wurrn wie an de Steenkannt fast, de Drift bröög 6½ Stieg Bütt vun de grod Tungplaten dor mang. As wi eben weer utsett, keem de Wind mit eenmol mit Regenslaag weer vun Nordwest un dee stief

S. 866

opfrischen, wie deen noch 2 Drifts maken, jeder mit 5 Stieg Bütt, 1 un 2 Steenbütt un 40-50 Pfund Platen. Ümm eben vör Klock 7 leepen wie naa de Sund to, mit een Fang vun 43 Stieg Bütt, 11 Steenbütt un an de Kannt 300 Pund Platen, de letzte Drift weer dat verdammt ruppig, deshalb deen wie ok utscheen. Dat weer noch een polterige Tour, beed wie Todendörp dwars harrn. Wie leepen man 700-800 Meter vun’t Land aff, hier weer de Seegang beed na Schönbarg to rech beed weniger. Aver vun dor beed nan de Kieler Föör rin, weer dat doch weer heel spökeli. Wi kregen een Barg Waader över.

As wi an de Seegarnsbrügg fast makten weer noch keen Boot dor, op de anner Sied un de Brügg lee dick een Dän mit Lohals ? hen, de 3.000 Pund Mitteldösch un 50 Kissen mit de Grod-Belt-Heern in. De Schipper verteel, dat hee een böös Wedder hatt harr. Wie dat utsäh bleem wi weer allen an’t Markt. De Priese weern liekers ümm 5 Penn op Pund weniger as bi de Tourn vörher. Dat keem jedenfalls dör de lebennige Middeldörsch vun de Dän. Naadat wi uns Fang veköfft harrn, güng ick naa de Bäcker, Semmeln un Melk to holn. Naasten deen wi Brennstoff un Smeeröl

S. 867

övernehm. Anschließend güng wi all dree to Stadt ümm Proviant bi Jakobsen intoköpen. As wi op de Trüchweg an de Fenster vun’t Seemannsheim in de Schohmaakerstraat seihn, dat dor to Meddag „Eirisch Steev” geev, güngn wi rinn un leeden uns dor wat to Eeten geven. Ümm Klock 2 deen wi weer utlopen naa Fehmarn to, de Wind weer een reine Westen bi 2-3 rümm, ünnerwegs de dat noch mehr affflaun. vun’t Land aff keem een warme, bruttige Luft naa See to, över’t Oldenburger Land bruu sick as schien een Gewitter op, wat sick vun de Wienbarg’n beed wied över de Sund naa Osten to utbreeden dee. Wie harrn noch nie Flühsand-Füürturm dwars, dor güng dat Theader los, mit een Blitz un Donner naa een anner, mit een Regen as wenn dat mit Emmers vun bobendaal goten keem. Wi deen affholn naa Orth to, de Nordwest keem mit een Sturmböe vun 7-8, de duur aber man een Ogenblick, dor weer dat glieks weer dotstill. 5 Minüten laater keem de Wind eben so hart ut Südost. As wie in Orth innleepen, säh wi de söß Böö ut Eckernföör dor lingn. Wi weern eben fast, dor sprung de Wind mit een Sturm weer op Nordwest un bleev

S. 868

bi to stürm mit Windstärken vun 6-7, as dat Gewitter över Fehmarn naa de Belt to afftrocken weer.

Uns Kameraden deen vertelln, dat se op de Weg naa Huus to weern, aver vör dat optreeken Unwetter naa Orth lopen sünd. Se deen fraagn, wo wi herkeem. Frie Mumm sä: „vun Kiel”. Se keeken sick gegensiedig an, un August Kreutz meen, dat wi de reine Fleegene Holländer weern. As Frie Mumm seggn dee: „Jo, August, dütt iss uns tweed Tour, de wi maakt hefft, wo ji in Staaken in Haabn lingn hefft.” Kreutz sä: „Wi lingn 10 Daag vör Wind in Haabn un ji maakt 3 Tourn naa Kiel mit gode Fänge!”. Dor dee mien Vadder vertelln, wie uns dat gahn is, as wie de Morgen mit de Süden utlopen deen: „Irst weer’t noch heel ruppig ween, aver de Wind weer jümmers beed mehr afflaut, ümm Meddag weer dat sogaar totenstill warn, dor deen wi uns Seil dicht maaken. Obends, as wie in de Sund rinnlepen, deen wi uns Seil weer sedden, denn dor dee een heel stiefe West weihn un de tweed Tour August, weer dat genau so, blots dor keem de Nordwest 4-5 all op de Naameddag, dorüm deen wi de Dag all fröher utscheen. Beed na Todendörp weer dat een polterige Tour.”

S. 869

Uns Kameraden wulln uns dat nie glöövn, irst as Frie Mumm se de letzten beeden Affreeken vun Kiel wiesen dee, wo se sick övertügn kunnen, dat wi se ni belogn harrn, dat wi in de 10 Daag 3 gode Reisen naa Kiel maakt, wo uns Kameraden vör slecht Witterung in Haabn leegn. Fr. Daniel