940

Anfang Dezember 1930.

Wi fischten in de Fehmarnbelt mi noch 2 Böö mehr, naa Bütt un Dösch (de beiden anner Böö weern Aug. Krus un Walter Wegner). Wi harrn in de irst Drift über 20 grote Schellfisch vun 4-5 ℔ dat Stück mit in de Zees. Dat weer een Överraschung, wo keen vun uns mit reek harr. So weer dat ock bie de anner beiden Böö weesen.

De ganze Dag weer’d Wedder goot un still, de lurige Witterung seh over doch naa Wind un Sturm ut, aß dat schummerie wer, keem de Mond mehrmals dör de Wulken schien, graad düße Drifts brögten uns in de 70 Stück vun de grote Schellfisch mit.

De Witterung gefull uns ganz un gornie, denn de Wulken deen vun Nordosten heer über de Mond weggjaag’n, un eb’n naa 21 Uhr, keem de Nordost anpüstern, as wenn hee ut een sack utschüttelt wor. Aug. Krus de ümm düße Tied graad uphohln, un leep naadem mit Kurs naa Huus to.

Wie harrn graad uns Gescheer weer naa Südosten utsett, er de Nordost ankeem, eb’n naa 22 Uhr deen wie dat weer uphohln. In düße Drift harrn wie 52 Stück vun de groot Schellfisch mit, wie beratschlaagten, up wie noch een Drift reskeern sull’n, denn Wedder dorto, weer dat mit schick nie mehr, as wie so ling’n deen.

Keem Wegner up uns to loppen, un reeb naa uns röver, dat hee de letzt Drift 54 Stück vun de groot Schellfisch hatt harr, hee wull trotzdem, dat keen Wedder meer weer, noch een Drift reskeern. Wie over weern sick eenie, dat weer eenfach keen Aart meer uttosett’n, wie harrn all een paarmals in all de Johrn bie sun Wedder dat reskeert, wenn de anner Böö allang’n ünnerweggs naa Huus to weern, un bie düße Gewaltdrifts weer meisten nie viel bie rut kaam.

Deshalb deen wie nu utscheed’n un leep’n ok mit Kurs naa Huus to. De Nordost nehm in de Boen jümmer meer to, as wie geg’n dat Millionviertel weern, keem een Boe so hart, dat hee uns mit dat lütt Zwicksegel wat wie vörheer all beed up 2 Reefs indreiht harrn, mit uns Deck in’d Wader drück’n dee, sunst dee de Nordost mit een barg Wind Stief dörstahn.

As wie bie uns in de Föör weern geg’n de Ortkaat aff, keem weer sun swöre Boe an, da hee uns mit dat lütt Zwicksegel up, uns Deck in Lee ünner Waader drück’n.

Aug. Krus weer ümm 5 Uhr an de Brügg weesen, wie keem eb’n naa 7 Uhr een paar Stünn laader. Wegner keem irst ½11 Uhr an, se weern to Schönbarg bald up Strand loppen. Wie Peter Schmidt un Walter Wegner uns de Saak vertähln deen, harr de ol Luden Wegner alleen an’d Roor (Steuer) stahn, sien Söhn un Peter Schmidt leeg’n vörn in er Kojen, do harr swöre Grundsee so überrollt, da döör keem de beiden, noch graad to recht Tied ut er Kojen rut an’d Deck, un sehn wat los weer. So kunn se noch in’d letzt Moment mit vulle Motorkraft mit er Fohrtüg in de Wind un geg’n de swöre See angahn, un sick so naa’d deep Wader to arbeiten, dat weer naa er vertell’n up een häng’n Haar weesen, sunst harrn se mit er ganze Kraam to Schönbarg in’d Strand leeg’n.

Aug. Krus sien Fang vun de groot Schellfisch weern 12 Zentner, wie harrn bie 15 Zentner, un Wegner bie 17 Zentner. Al 3 Böö harrn dormit in de enkelte Drifts ungefähr dat sölbe fung’n, dat meer vun de Fänge keem dor döör, wie harrn 1 Drift un Wegner 2 Drifts meer makt wie Kruse.

Aug. Krus harr sien Schellfischfang utslaggt, un bie Hopp un Rehs afflevert, wie harrn 800 ℔ utslaggt, deen se ock bie Hopp u. Rehs afflevern, de sull’n ümm 9 Uhr naa Hamburg an’d Fischmarkt schickt warn. Wie mußten noch bie 700 ℔ utslaggten, aß wie dormit ferdig, keem Walter Wegner bie uns an, un seggt, dat wie uns Restfang, mit sien Fang tosaam naa Hamburg, über de Genossenschaft schick’n sull’n, dat göng’n ümm de Klock 3 los, de Saak keem uns god topass.

De anner Naamiddag ümm de Klock 5 keem W. Wegner bie uns an, un segg hee weer bie de Genossenschaft weesen, ümm sick to erkundigen, wat de Schellfisch vun Pries brögt harrn. So harrn se bie Köser anrobb’n un Bescheed kreeg’n dat de Pries vun 46-48 Penn rein för’d Pund utbetollt wor, dat weer denn jo een ganze gode Pries seggten wie all tosaam.

As Aug. Krus dat hör, göng’n hee glieks naa’d Kontor vun Hopp u. Rehs hinn, un keem mit de Bescheed wer, dat er Schellfisch 27-28 Penn förd Pund brögt harrn, somit up Pund 20 Penn wenniger as bie de Genossenschaff. Wie harrn dor döör ut uns 724 ℔ For 130 Mark meer ut makt, as ut de 800 ℔ de wie bie Hopp u. Rehs afflevert un naa Hanburg schicht weern.

As sick de Witterung naa 4 Daag beruhigt, makten wie 3 Böö sick weer up de Reis naa de Fehmarnbelt to. Wie fischten sick dor een Fang vun 4-5 Zentner Dösch un 2½ Zentner Bütt tosaam, dat weern all vun de irsten Winterbütt, over an Schellfisch nie een mit all 3 Böö.

As Düster wor, leepen wie tosaam naa Huus to, denn de Luft, se dornie naa ut, dat wie de anner Dag, noch tofischen kunn. Denn ünnerweggs as wie geg’n de Kieler-Föör weern, de dat ut Westen all stief köll’n, un as wie bie uns in de Föör weern, harr de Wind up Nordwest dreiht un to nahm up 5-6.

Dat weer denn ok för dütt Johr de letzt Reis naa de Fehmarnbelt hinn.

Fr. Daniel