De meisten Ökelnaams kommt von de Tied, aß de ganze Fischee noch op er Segeln un reems anwies weern, un er ganze Arbeit mit Menschenkraft utföhrt waar, vor all'n, bie de Handwaadenfischerie mit de 16 Längsche Waad'n mit de grod Klunkers von Steen an, wat dormaals mit ünner een böö, Schinnerie wesen ist.

Aß de Waad'n-Fischerie ümm de Johrhundertwend in de Blöt un op den höchsten Stand stahn dee, wo üm de 70 Handwaad'n in Betrieb weern, mit an de Kannt von 450–480 Mann, aß Besatzung, op jede Waad keem 6–7 Mann, ohne dem göng'n dat nie. All düsse Lüüd mit er rechten Naam antospreek'n weer veel to ümmständlie, so keem dat mit de Okelnaams in Gang'n.

Wenn de Besatzung tosaam weer un een un anner vertell wat, so bruck hee bloß maal een aparten Utdruck to seggn, un dar füll bie sien Mackers op, so stünn faß, dat hee sien Ökelnaam wegg harr. Denn jede Ökelnamm stünn mit de bedropene Person, op irgend een Art un Wies in Verbindung – wat hee maal maakt oder snackt harr, wo he herjeen, oder wesen weer, ebenso naa sien Charakter un sien Verhohl'n. All düsse Saak'n harrn vör de enkelte Person sien Ökelnaam in'd Wark sett.

Man sall nie denken, dat düsse Naams eenfach so ut de Arms schüttelt sünd – nee, jede Ökelnaam hätt sien Bedüdung för de Person, de dor mit benennt ist.

Een ganz Deel von de Besatzung för de Waaden weern Lüüd, de Sommerdaags op Fehmarn oder Holsteensche Güter in de Oorn arbeit hevt. Weer de Tied vorbie, keem se naa Eckernför, ümm bie de Waadfischerie aß Waadtreckers för de Winter över de Runn to kaam. Mehrere weern ock bloß bekannt mit er Okelnaams, loscheern deen düsse Lüüd bie Hein Flüh in de Ostseehalle, un in de Harbarg to Heimat an de Eck von Achterstraat un de Niewohn, un ok bie Tank an de Jünfernstieg. Eenige weern ock in Privatloschie.