Die Geschichte hieß ebenfalls “Med to Water”, wurde von mir, um Verwirrung vorzubeugen, umbenannt
Sommer ngenteihnhunnertteihn, Fiede Drees würr düssen Sommer teihn Johr old. He weer de Ölst in een vun de veelen Fischerfamilien, de in düsse Stadt an de Ostseeküst siet Generatschoonen de Fischerie bedreeven. So stünndat ok för em fast, dat he Fischer warrn wull. Ok dat weer Traditschoon, dat een Fischerjung med teihn Johr sien eerste groote Fohrt medmaaken dee. So sull he nu also ok in de Sommerfrien dat eerste Mal med to Water. Med to Water, dat weer keen Snakk med to baaden to gaah'n, ne, dat bedüder med op See, op Fangfohrt. Sünnabend weer de lest Schooldag un Sundagmoorn Klokk veer sull dat losgaahn.

Sien Vadder, Willem Drees, weer to Sommer för een Johr to een Reserveövung med de kaiserliche Torpedoflotte vun Kiel dat eerste Mal in Meckelnborg west un se harrn op Rügen in Sassnitz eehrn Insatzhaben hatt. Dorbi weer he med een poor vun de Fischer ut Sassnitzer künnig woorn. So harr he to weeten kreegg'n, dat dor in de Sommermaanden bannig veel Bütt to fischen weern un ok een goode Markt bestaah'n dee. Se harrn meent, kumm man mal med een poor vun diene Kollegen neeste Johr för een poor Weeken to uns. Plads un Fisch is för uns al gehoog dor. Se harrn ok meent, dat se dat Plattfisch med eehr Zeesen orer med Bungen fangn dünn. Se harrn aver vun eehrn Fischmeister höört, dat an de Schleswig- Holsteensche Küst med Büttgoorn fischt woor. So harrn se tom eersten Mal de Gelegenheid, düsse Fischerie sülvst in Oogenschien toneehmen.

Nu harr Willem Drees eerst sien Vadder, dat weer Fiede Drees sen., un sien Macker, Fiede Mommer, besnakkt, dat se dat mal versöken sulln to Rügen to fischen. Dorto is to segg'n, dat de dree sick negenteihnhunnertveer een nie Büttquase op de hiesige Werft harrn buun laaten. Dat weer een Bood vun nie Oort, so üm de veertig Foot lang un twölf Foot in de Breede. As Tweemaster med een Gaffeltakelaasch weer dat hel seedüchdig. Düsse Bööd weern ut dat beste Eekenholt ut de Ümgegend buut. Eeen Johr later harr se sick no een Eeentaktdieselmotor ut Dänemark inbuun laaten. So weern se ni meehr so afhängig vun Wind un Wedder.

Dat se düssen Sommer na Rügen wulln, harr sik bald bi de Fischerkollegen rümsnakkt. Wiel de Büttfischerie in de För för de grooden Bööd sik ni meehr renteern deen, dor ok veele Lüttfischers med Trietzen un Goorn un Ruusen eehr Brood verdeenen deen, weer veel vun de Büttquasen, dat geev in düsse Johrn so an de föftig Bööd in uns Stadt, ünner de dänschen Inseln foht. Dor woor dat aver ok ümmer enger un besünners de Dänschen Fischer weern veelmeehr op Motorn ümrüst. Se harrn ok för twee Johrn dat eerste mal med een niees Schleppnett, de Tuck, dat weer een gröttere Zees na Bütt fischt un harrn groode Fänge hatt. So weer för de Büttgaarnfischerie ne meehr altoveel Plads tom fischen. Ok de dänsche Fischerieopsicht weer ördentli wat strenger woorn un kasseern de Netten, so se een 'Tyske' dat eerste Mal faat kreegn, de sien Netten in de Dreemielenzone utsett harr. Dor de Bööd med eehr Büttgaarn med Strom un Wind dreeven, weer dat besünners bi Nacht licht möglich, dat se ööver de Grenz keemen. Bi'n tweeten Maal kunn dat ok all Straafgelder opto geeven.

Nu geev sick een nie Möglichkeid för de Sommerfischerie. So harrn sick teihn Bööd, dorvun söss med Motor un veer Seilquasen tosaamen funn un wull de grode Reis medmaaken. Um düsse Reis, de tom eersten Mal so üm hunnertdörtig Seemielen in de Ferne gaahn sull, veel in de Stadt snakkt. Meenigeen holl dat för Gröötenwaahn un besünners ok öllere Fischerkollegen schüttkoppen ööwer düssen jungshaftigen Lichtsinn. Aaver dat geev ok veele, de meenen, dat wär een gode Saak, dat de Fischerie wieder kieken de un dordörch, dat jo ok eenige Öllere dorbi weern, Grootvadder Dreevs weer med sien sößdig Johr ni de Öllste, würr dat wull ok good gaahn.

Dat nu aaver ok een poor Jungs, so as Fiede Drees med teihn Johr, Franz Krus med olben und Kalle Bergamnn med teihn, med sulln, dat güng meenigeen wull doch to wiet. Sogoor een poor vun de Lhrers sulln dorvun afraad hebbn. Aaver Fiede Drees sien Vadder un ok de annern weern de Meenung, dat weer richig. Wat een ördentli Fischersmann waarn wull, müss ok al in fröhen Johrn Med lange Reis, Nind un Wedder kloor kaamen. So bleev dat dorbi, de Dree sulln ni blot dat eerste Mal med to Water, e se sulln ok glieks med op grode Reis. Nu weern se, wo kunn dat wull anners sien in de lsten Dag for dat losgaahn sull, de Hauptpersonen in de School un wurrn vunh meenigeen bewunnert. Dat geev aaver ok

wulke, de for Afgunst orer ut anner Grund'n, se opn Arm neehmen. Na Fiede, wonehr warrst seekrank? noch in Haaben ?. Hett dien Modder ok nok Winneln inpackt? Pass man op, in de Wisch - dat weern tweedusend meder ut'n Haaben - sett si di ant Land un du muss tofoot na Huss loopen. Aaver Fiede sien Klassenlehrer Jessen meener: „ Fiede, du hest tom eersten Mal dat Glukk, meehr vun de Welt to seehn, as anner Kinner un passt good op di op un mark di allns, wat di Bsünneres opfallt un leehr anner Lüüd un Gewohnheiden kennen. Bring uns een Stück vun de Kriedfelsen med, dormed wi seht, dat du dor west büst un goode Reis“.

De Sünnabend würr de hele Dag dormed trobröcht, de Bööd klortomaken, Proviant to stauen un de Netten an Bord to bringen. Wi Jungs harrn all de Week ööver poor Molln vull Steen to sammeln. Dormed woorn de Netten an't ünnere Enn bestükkt. An't böbere Enn weern Korken anbröcht. So stünn'n de Netten as een Wand int Water. De Steen müssen so swör sien, dat de Gaarn bed na de Grund sinken deen, dor de Bütt as Plattfisch sick jo an de Grund opholln deen. Sünnabendnamiddag wor sick bi de Marinestation in Kiel no mal na dat Wedder erkundigt. Op Water weern de Bööd op sick allen anwiest, dor to de Tied de Fischerbööd no keen Funkudrüstung harrn. Man harr sick afmaakt, dat man de Reis ünner Seils maaken wull, de Motoren sullen bloos bi een Notfall brugt warrn. Dre Bööd med Motor sullen vöran seilen, so keemen de reinen Seilböd un achdern sulln de anner dree Bööd med Motor seiln. Dor sull ok op Sicht seilt warrn un för een Notfall woorn besünnere Signole fastleggt. De eerste Törn sull bed Fehmarn gaahn, dat weern goode föfftig Seemieln. Dor wull man gen Sündagabend för Anker gaahn un Mondagn ööver Dag wieder seiln. Op man de Rest in een Törn schaffen kunn, hüng vun de Wind af. Dor man nachts sie seiln wull, weer dat möglich, dat mann noch mal an de meckelmbörger Küst för Anker müss.

In de Nacht to Sündag kreeg Fiede Drees keen Oog to un he weer moorns de eerste in de Plünn. Fröhstükken wull man an Bord un üm veer weer allns klor tom afleggn. Dor weern eenige Lüüd an de Brüch üm totokieken, as de eerste grötterr Fischerflotte in een Tog dat eerste Mal op groode Reis güng. Fiede sien Modder weer med sien lüte Süster un Broder, de leg noch in de Kinnerwaag ok med na de Brüch kaamen. „Pass good op de Jung op” reep se eern Mann un ok eehrn Swiegervadder to un kummt heel trüch“, dorbi harr se wull do een poor Traanen in de Oogn, as ok de Mödder vun de annern beiden Jungs.

Nu legger een na de anner vun de Bööd af un setten de Seils. De Wind kee bi twee un dree ud südwest un weer ideol üm ut de Haaben un de För to kaamen. Dat weer smukk antoseehn, as de teihn Bööd nu ünner vulle Seils eerst een Slag na Süden un dorna Kurs Nord-Ost neehmen un in Kiellinie de För lang utleepen. De Tweemaster harrn ni alle Seils sett, dormed se de Lütteren ni wegloopen deen. Nu weer Fiede Drees dat eerste Mal med to Water un dat op groode Reis op See.

He harr ok glieks wat to doon. As jüngste weer he för de Kombüs tostännig un müss för Kaffe un Fröhstükk sorgn. Dat weer ok dat eerste Mal, dat he för sowat de Verantwoordung ööverneehm. He Harr sick aver vun sien Modder dat bibringen laaten un sien Plog weer med dat eerste Fröhstükk wull tofreeden. Se maaken gode Fohrt un üm Klokk teihn rüm harrn se de Stoller Grund to faaten un leepen nu med Ostkurs in Richtung Probsteier Küst. De Wind weer nu een beden Stärker woorn un harr on keen een bedeb südlicher, so dat se nu de See quer kreegn. Dat duur nu ok ni meehr lang, dor woor uns Fide dat een beeten komisch in de Buuk un he woor ok teemlich blass üm de Naes. Na, Fidek Küst