[...] enanner spreeken, se harrn er Gaarns, de Hull an'd vierte Holt trocken mit bloß 12 Stieg Bütt, nu wull'n se hiermaal versök'n. Mien Vadder lepp noch een gode ¼ Stünn naa Norden to, un so deen se er Gaarns naa de Keeknisser-Fürturm to an de Nordkannt vun de Breedgrund utsetten.

Aß se dor mit ferdie, kunn wie Leckbands Boot mit Segel op noch god sehn, bie uns an Bord wor'd Grodsegel, un de Fook sett, mien Vadder un Fiede Mumm steeken de grod Klüverboom rut, denn wor de grod Klüver sedd. Junge, wat weer dat een Spaass! De Wind keem ut Nordwest 2–3, wie mien Vadder segg'n de, hee de fleuten, un sing'n in de grodt Klüver. Fritz un ick leeg'n beide vör un keeken över Bord, wie dat för de Bug Schüüm de.

Wie makten mit vulle Segeln un de Motor ingang'n, wo de Wind noch een beed to nehm, meen mien Vadder, dat wie bie 7 Seemieln Fohrt maken deen. Aß wie Sliemünn dwars harrn, weern wie Leckband all een barg neeger kaam, geg'n Booknißeck leppen wie se vörbie. Bie de Langhöfter-Bak wor de Klüver daalhoholt, over mit Grodsegel un Fock un Motor göng'n dat wieder beed naa de Ohrt, wo de Fook daalfiert, un dat Grodtsegel an de Mast dicht maakt.

Vör Fritz un mie weer'd een schöne Reis wähn, wo wie beide noch öfters över snack heft.

Fr. Daniel

Ock nochmal med to Wader: Beide sünd wie noch 1912 mit to Waader wähn, eenmaal mit de Büttgaarn, un eenmaal mit to tucken. Mien Vadder harr mie mol versproken, wenn se mit de Heerngaarn in de Sommerferien naa Fehmarn fohrten, wull hee mie mit nehm. Over dor wor nichts funn, den mien Grodvadder harr Walter Dreevs (Puttie) dat ok versproken, un so mein mien Vadder, ick sull man dor opversichten. Denn 2 Mann kunn se an Bord nie ünnerbring'n.

Hee segg dorvör: „Kannst du, wenn weer hiersünd, lever weit fohrn.“ Ick weer irst sunn beed vertörnt, over de mie doch weer beruhigen. Denn, aß se mit er Heerngaarn op Fehmarn weern, so schreef mien Vadder, se harrn dor veel schlecht Wedder un ok weer dor noch wenig to fang'n.

Un wenn die Fischerie sick nie beedern de, keem se bald weer to Huus. Do weer ick ganz beruhig, un de mie freun dat ick to Huus weer.