==== Dat Kleeblatt und sien Peerhannel. =====

Door weern mol 3 Fischerslüüd, de Loew, Teepott und Jecke, de tosomen een Quatsch harrn för de Büttgoornfischerie noh Goldbütt. De 3 weern heel lustige Gesellen;  wenn dat Gelegenheit geef, wat uttofreten, so leten se nix anbrenn.

Dat weer mol to Johannimarkt, wo jüst de 3 sick mol een vergnögten Dag gönn wulln. So besöchen se eerstmol de Lokale, wo Tingeltangel weer, und harrn so bi disse Rundreis sick schon ordntlich een antüdelt. Trotzdem weern se sick eenig, am Mondag, wo Peermarkt weer, werrer hintogohn.

As sick nu dat Kleeblatt mang de Peer und de Handlers dorümtorkeln deen, und keen sick ümm se kümmern dee, dat hett de 3 schändlich ärgert, wiel se doch bi de Aukschon mitbeden wulln. As se nu ok bi de Versteigerung von son Krack vun Schimmel mit beden deen, kreegen se mit eenmol de Toschlag bi 60 Mark för dat klapperige Tier.

Nu müssen se jo betohlen, ober all 3 harrn jo ni soveel Celd mehr, so müss Jecke to Tedje Michelsen, de Kröger vun Stadt Kiel hin, um sick de 60 Mark bi em to pumpen. Door weer ok nix in de Wech, denn de 3 hörn to de sülbe Johrgang und weern Scholkollegen vun Tedje.

As de Schimmel betohlt weer, kunn dat Kleeblatt mit ehr Krack nohuus rieden. De Toschauers hebbt Jecke und Teepott op dat Peerd sett und de Loew heel dat Tier mit de Trens an de Kopp fast. So güng dat Kleeblatt nu mit dat Peer und een Schoof Jungs achterran noh de  Jungfernstieg rünner.

As se bi Jägersborg ankeemen, wo de Loew wohnen dee, bunn se ehr Gaul an een vun de Lindbööm fast und de fung glieks an, de Bläder antognappeln – harr wohl lang nix kreegen. Een Stücker wat twinnig Jungs und Deerns harrn de 3 mit ehrn Gaul dat Geleit geven.

De Fruuns vun dat Kleeblatt weern de ganze Morgen all besorgt üm ehr Männer wesen, denn se kenn ehr Adschewieners und wat se all vörharrn, wenn de 3 tosomen op Tour weern. So berotschlogten se denn in de Wohnung vun de Loew, wie se ehr Männer werrer ant Huus kregen.

Dat Kleeblatt, so wurrn de 3 vun ehr Fruuns benennt, kunn jo ni weten, dat se mit ehr Gaul ehr Fruuns direkt in de Mööt keemen. Und glieks güng door een schwöör Gewitter op se dool. All 3 stünn door vört Huus wie son begoten Pudels, denn op son Empfang weern se jo ni vörbereitet. Dat de Fruuns se ober ok so vör de Öffentlichkeit aftokeln deen!

Een vun de Fruuns güng glieks noh Peerschlachter Ewers hin und stell em dat Drama vör. He keem denn ok glieks mit und bekeek sick dat Objekt, wo dat Kleeblatt nu Eegendömer vun weern. He meen sogor, de Schimmel weer gorni mol so uneben und wat se denn doorför utgeven harrn.

As een vun de 3 denn schüchtern seggen dee „60 Mark“, door meen he: „Ick legg noch 10 Mark to und de Schimmel hört mi.“ Doormit weer de Hannel und ok de Spektokel twischen de Fruuns und ehr Männer beendet. Doch noch lang wurr dat Kleeblatt und ehr Peerhannel belacht, ober bi lütten geef sick dat ok werrer, denn sowat kann doch op de een oder annere Wies een jeden mol passern. 

Fiete Daniel.